Höfuðstöðvar og framleiðslustaður Ekta fisks er á Hauganesi í Eyjafirði.
Hauganes er lítið þorp í vestanverðum Eyjafirði, 22 km norðan við Akureyri og 12km sunnan við Dalvík. Þar búa um 100 manns. Hauganes tilheyrir Árskógsströnd og er hluti af sveitarfélaginu Dalvíkurbyggð. Aðra starfsemi á Hauganesi má nefna Whale Watching Hauganes og smábátaútgerðina Kussung. Frá Hauganesi sér yfir á Ytri-Vík ferðaþjónustu til suðurs, yfir til Grenivíkur til austurs og út í mynni Eyjafjarðar til norðurs.
Á Hauganesi er nýlegt tjaldsvæði sem er opið yfir sumartímann. Rétt sunnan við tjaldsvæðið liggur Sandvíkurfjara en þar höfum við komið fyrir nokkrum heitum pottum í flæðamálinu og aðstöðu. Ströndin er grunn langt út í sjó að stórum hluta svo aðstæður til sjóbaða eru einstaklega góðar. Sandvíkurfjara er líklega eina sandfjaran á Norðurlandi sem snýr móti suðri.
Við þjóðveginn fyrir ofan Hauganes stendur Stærra-Árskógskirkja, Árskógarskóli og Leikskólinn í Árskógi, ásamt íþróttasvæði Dalvíkur-Reynis.
